Uralistica

Эрзянь Инязоронтень - 75! \ Инязору Эрзя народа - 75!

                                    ШУМБРАКСТЕМА ВАЛ

Кшуманцянь Пиргужнэнь -75!

                                  «Эрзянь Масторонь ине ломань»...

    Неть валтнэ ульнесть ёвтазь Кшуманцянь Пиргуждо (Мусалёв Дригадо)  "Масторава" вейсэндявксонть чачома чинзэ тешкстамсто, 2010-це иень таштамковонь 27-це чистэ, раськень театрасо.

        Сынь кандыть ды пачтить алкуксонь смусть весементень, мезе тееви-путови Эрзя раськенть вельмевтема тевентень те ломаненть пельде. 1989-це иестэнть саезь, неень шкас, сон вети ине вельмевтемань тев, пачти модамасторонь келес видечи тиринь раськеденть, сонзэ эрямочидензэ, ине эрзятнеде, конат чанстизь Эрзянь Масторонть. Эрзянь Инязоронть  ламо ятонзо. Сынь миизь эсест раськенть тантей сускомапелень кис, ингельде невтить культуранзо, ине эрзятнень тевест. Содави, Инязор  важоди эсензэ раськензэ лемс, аволь мастор пурнавксонь кирдийтненень.

     Эрзянь Инязор - вейкесь сеть эрзятнень эйстэ, кить "чапизь» «Масторава" вейсэндявксонть ды пурнызь эрзянь келень идемань Фондонть 1993-це иестэ, кона кармась нолдамо "Эрзянь Мастор" кулялопанть. Мейле ульнесь яволявтозь эрьва иень чадыковонь 16-це чись Эрзянь Келень чикс. Сон тешкстави-ютавтови аволь ансяк минек масторсо. Эрзянь Инязоронь  вийсэ ды мельсэ ушодовсь Велень Озксонь ды Раськень Озксонь ютавтомась.

     Весе неть ёвтазь Инязоронь тевтне кепедизь минек раськенть сэрьксэнзэ лия  раськетнень сельмсэ ды лездасть эрзянь раськенть ойме ёжонзо вельмевтема тевсэнть.

 Кшуманцянь Пиргуж кочказель Инязорокс 2004, 2007, 2010 ды 2013-це иетнестэ. Чачсь Инязор  1940-це иень сундерьковонь 19-це чистэ Ташто Кшуманця велесэ. Тонавтнесь физматонь факультетсэ Огарев лемсэ МГУ-со. Тоско ламо иеть важодсь математикань тонавтыцякс.

Чачомчить марто! Шумбрачи теть ламо иес, Пиргуж Инязор!

Эрязо Эрзя раськесь!  Инешкипаз,чангодть!

Эрзянь Инекужонь Топавткурось. 2015 ие, сундерьков, 19 чи.

Просмотров: 168

Эта запись блога закрыта для комментариев

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования