Uralistica

“Вордскем кыл” журналлэн выль редактореныз интервью: “Али кунамы огыр-бугыр вакыт – удмуртлыке воштонъёс пыртыны луонлык вань”

«Вордскем кыл» журнал удмурт изданиос пӧлыcь кылдэмез дырысен висъяське. Туннэ нуналлы но журнал огшоры ИТВ (СМИ) ӧвӧл: со луэ удмурт кылъя дышетӥсьёслы юрттэт сётӥсь нимысьтыз площадка. Трос ар ӵоже «Вордскем кыл» тодматэ дышетон удысысь выль программаосын, методикаен - удмурт кылъя но литературая урокъёсты туала амалъёсты кутыса радъяны юрттэ. Берло дыре дышетӥсьёс понна мультимедийной электрон ресурсъёс но дася на.


Кема ик ӧвӧл “Вордскем кыллэн” валтӥсь редакторез Илья Байметов улонысь кошкиз. Солэсь ужзэ азьланьтоз егит тодосчи, журналист Павел Баженов. “Уралистика” тодоно кариськиз мар выльдӥськоз журналын, ма кулэ удмурт дышетӥсьлы ужзэ пайдаё радъян понна но ма муген умуртлыклы кулэ йыг-йыг воргоронъёс.

Алигес тӥ «Вордскем кыл» журналлэн валтӥсь редакторез луиды. Мар воштӥськоз журналын вуоно арын но кыӵе выльдӥськонъёсты возьмано?
«Вордскем кыл» журналын мон ужасько ини 6-тӥ арзэ. Та дырозь валтӥсь редакторлэн Илья Михайлович Байметовлэн воштӥсез луыса ужай. Жаляса верано, со улонысь кошкиз. Та аръёс ӵоже ми Илья Михайловичен троссэ малпанъёсмес улонэ пыӵатӥм. Кылсярысь, журналмы вӧзы дышетӥсьёслы юрттэт - мультимедийной дискъёс поттыны кутским, удмурт литературая котькуд класслы учкем методической пособиос дасямы. Мон малпамъя, со бадӟым юрттэт луэ дышетисьёслы. Угось дышетон технологиос выльдӥсько – соин удмурт дышетон удыс но бере кыльыны кулэ ӧвӧл.


Азьланез шоры учконо ке, вань малпан журналмылэсь вылтуссэ воштыны. Адӟиськоды асьтэос стилистикаезъя со вужмемын ини. Ма шонер, кемалась вылтусыз воштэмын ӧй вал ни. Та сярысь мон кенеши удмур пияшен – дизайнерен. Вуоно арын январе ваньмыз умой мынӥз ке, малпаськом выльдэм тусо номер поттыны. Пуштросэз ласянь ке верано, журнал мыным яра. Но вань малпан выль рубрикаос кылдытыны. Шуом, егитъёсын гожтэм но соослы сӥзем бам кулэ. Мон герӟаськи УдГУ-ысь, Можга педколледжысь но Глазов пединститутысь дышетскӥсьёсын. Вераським, соос милемлы гожъялозы шуыса ужрадъёссы, вормонъёссы сярысь. Спецкорреспондентъёс выллем луозы.

Озьы ик малпан вань «Моя Удмуртия» телеканалэн кусып юнматыны. Та пумысен кенешим Лена Слесареваен «Малы ке шуоно» передачалэн нуисеныз. Малпасько, туж умой луысал быгатысалмы ке передачаяз 5-7 минут куспын тодматыны исследовательской уж нуись удмурт нылпиосын, дышетӥсенызы. Шуом, кыӵе ке тематической рубрика.

Вуоно арын «Вордскем кыллы» кызь вить ар тырмоз. Таин валче малпаськом ортчытыны бадӟым коференция. Журналмылэсь эшъёссэ, гожъяськисьёсты, удмурт кыл бордын ужасьёсты люкалом. Оло, соос но ӵектозы маке тунсыкозэ журналмес выльдон ласянь.

Ма бордын удмурт кылтодосчиослы но удмурт дышетӥсьёслы нырысь ик ужано?
Кылтодосчиос асьсэос тодо, дыр, кыче ужпумъёсты матысь дыре сэрттоно-пертчоно. Удмурт дышетисьёслы но школаосазы удмурт кылъя но удмурт литературая предметъёсты дышетон программаысь куштонтэм вылысь нюръяськоно.

Тырмо-а удмурт кылъя методико пособиос?
Куке 90-тӥ аръёсы удмурт кылэз дышетыны кутскизы, туж кулэ луизы методической пособиос. Соос чик ӧй вал. Со дырысен методика бордын уж нуиське, пособиос потылыны кутскизы. Соку ик кылдытэмын вал «Вордскем кыл» журналмы но. Дышетӥсьёслы со бадӟым юрттэт луиз. Оглом учконо ке, туннэ соос тырмо. Алигес тани «Ӟеч-а бур-а, удмурт кыл!» учебник потӥз. Со дасямын удмурт кылын вераськисьтэмъёслы, та учебникъёслы но методической юрттэт сётонъя пособиос потто ни. Озьыен, уж мынэ, луонлык вань удмурт кыллы дышетыны.

Кыӵе югдур дышетӥсьёслы дасям интернет-сервисъёсын?
Узыр материалъёсын интернет-сервисъёс али ӧвӧл на, но бератаз вераськонъёс потыло ни. Миннацын но сыӵе мылкыдъёссэс шараязы, дышетӥсьёслэсь тодон-валанзэс будэтонъя институтын но. Ӟуч кылын вань пӧртэм интерактивной-мультимедийной материалъёс. Удмурт кылын душетӥсь понна мультимедийной ужъёс туж ӧжыт. Дышетӥсь, шуом, лэсьтэ туж умой пособие, но сое вӧлмытыны луонлык ӧвӧл. Соин ик, сыӵе ресурсъёс туж пайдалыко луысалзы удмурт дышетӥсь понна.

Кыӵе интернет-проектъёс кулэ удмурт тодосчиослы, дышетӥсьёслы?
Кык ар талэсь азьвыл туж бадӟым мылкыды вал кылдытыны удмурт дышетӥсьлы сӥзем ресурсэз. «Вордскем кыллэн» сайтаз, жаляса верано, лэсьтыны сое ӧз пӧрмы. Мылкыд вань ке но, мукет ласянь огнад трос лэсьтыны уд вутты. Кылем арын Миннаце ӧтемын вал тодосчиос, дышетӥсьёс, ӧнерчиос. Котырес ӝӧклэн ужаз мон но пыриськи. Туж оскисько, матысь дыре сыӵе порталэз усьтон уж борды басьтӥськозы шуыса.

Макем паськыт уже кутӥське удмурт кыл? Вань-а луонлык сое паськытатыны?
Таин валче учыр тодам лыктэ. Элькунамы нылпиослы радъяськись конкурсъёсын, конференциосын жюри луыса ужасько ни вить ар пала. Туж шумпотоно пиналлэсь та дыр ӵоже будэмзэ адӟыса: удмуртлыкен герӟаськем тодон-валанъёссы исследовательской уж нуэмзыя пумен-пумен муромо. Соос мыло-кыдо пырисько пӧртэм ужрадъёсы. Но сюрес вылазы удмурт кылэн герӟаськем могӟетъёс сюрыло вылэм - дышетӥсьёс йыркурзэс веразы. Конкурсэ, пе, пыриськыны удмурт кылын гожтэм уженызы уг лэзё – берыктыны косо ӟуче. Со ведь алама. Кинлэн потоз одӥг уж интые кыксэ каремез? Та учыр, мон сямен, удмурт кылэн герӟаськем югдурез шарая. Элькунмылэн катаз удмурт кыл госудасртвенной шуыса юнматэмын ке но, уж вылын уг быдэсъяськы.

Тӥ сямен кулэ-а удмурт кылэз ваньмызлы одно ик дышетыны?
Удмурт кылэз ичигес но ичигес дышето ни. Оглом учконо ке, 90-тӥ аръёсы 420 пала школаын дышетӥзы удмуртэз. Та нуналлы ладпус кулэсмемын 206-озь. Озьыен, ог ӝыныез дышетонлэсь куштӥськемын. Дышетысалзы ке удмурт кылэз школаосын, солэн сюресэз капчигес луысал. Озьыен, али югдур алама.
Та ласянь йырын пӧртэм малпанъёс. Одӥг ласянь учконо ке, трос кылэз тодон – бадӟым узырлык. Сое котькин валаны кулэ кадь… Но али ведь дышетоно-а ӧвӧл-а удмурт кылэз – быръе директор. И со умойтэм, мон сямен. Малы ке шуоно тросэз аналтӥсько – асьмелэн калык дышемын: уг ке косо, сое кароно ӧвӧл. Та муген но, дыр, пӧртэм валэктонъёс шедьтыса, кыллэсь куштӥсько: пиналлы секыт шуо - ЕГЭ-лы дасяськоно, нош удмурт кыл дырзэ гинэ быдтэ. Та шонертэм. Кызьы ке вылӥысен та ужез радъяны кулэ.

Али кыӵе югдур удмуртлыкен?
Мыным потэ, али сыӵе дыр, куке кыӵе ке воштӥськонъёс пыртыны луоз. Пересьмыса ужзылэсь палэнско, улонысь кошко удмуртлык понна нюръяськись бадӟым адямиос. Озьыен, та интыос бушесь кыле. Егитъёс соослэсь ужзэс адӟо но сюрес вылазы султыны уг дырто на. Но али 20-40 аресъемёс ӧз ке кутске удмурт кылэз но литератураез ӝутыны, ог 20 ар куспын югдур трослы уродмоз. Соин ик али кутсконо. Али, куке кунамы, элькунамы огыр-бугыр вакыт – асьмелэн вань луонлык мае ке воштыны. Таӵе луонлык вал СССР куашкаку 90-тӥ аръёсы, куке удмурт кылэз дышетон паськытаз. Дырыз дыръя уж кутскемын вал.

Кызьы учкиськоды туала удмурт движение шоры?
Туж жалясько, удмуртлыкысь воргоронъёс кошко шуыса. Журналистика удысэз ик басьтоно ке, тодады вае «Советской Удмуртия» газетэз: отын 90-тӥ аръёсы йӧн-йӧн воргоронъёс ужало вал. Мон малпамъя, воргоронъёс ас кылзэс вераны кулэ. Но, валамон, ваньмыз коньдонэ пыкиське. Воргоронлы семьязэ сюдоно – гожъяськон удысысь но тодосысь, шуом, соосты шер пумиталод ни, угось татын уксё трос уд потты. Зэмзэ, аслам но вал малпанъёсы гожъяськон удысысь кошкыны. Ватытэк верано луэ, туннэ нуналлы, уксё вань ке тон адями, ӧвӧл ке – нокин тонэ уз кылзы.

Мар шуысалды удмурт кыллэн интернетын вӧлскемез сярысь?
Удмурт интерент ласянь тодонэ туж ичи. Мон вань контактын, фейсбукын… Но монъя со кыкетӥ дунне, кудӥзлэн аслаз интыез но со куддыр чик но уг герӟаськы зэмос улонэн. Мукет ласянь отын туж умой будэтыны егит кадръёсты, вӧлмытыны удмурт кылэз калык пӧлы – егитъёс пӧлын.

Тросэз арлыдо гожъяськисьёс пыкыло блогзэс нуись егитъёсты удмурт кылзы йырин. Литературнойлэсь кыдёкын луэ шуо. Мар малпаськоды та ласянь?
Куке блогъёсын малпанъёссэс гожъяло – со туж умой. Мон сямен, егитъёс пичиен мар ке бордысен кутскыны кулэ. Мед нырысь соос алама гожъялозы, быгатытэк, янгышъёсын - дыр ортчыса соос волятозы кылзэс. Аслэсьтыд мылкыддэ ведь усьтыны секыт, тужгес но али гожъяськыны кутскемлы. Адями быгатэ ке, мылкыдыз вань ке, мед гожъялоз – талы пумитъяськоно ӧвӧл. Сураса-а пожаса-а – мед гожтоз. Гожъяськыса-гожъяськыса со ачиз вуоз литературной удмурт кыл доры. Блогъёсты лыдӟыса ас калыкед шоры, адымиос шоры но ачид шоры учкондэ воштӥськод. Мукет синмын учкыны кутскиськод, шуод-а мар-а – со туж пайдаё луэ.


Вераны кулэ на, стилистика ласянь учконо ке, милям но ведь удмурт изданиос: «Инвожо», «Вордскем кыл», «Удмурт дунне» - висьъясько ог-огзылэсь. Котькудӥзлэн аслаз учконэз литературной удмурт кыл шоры.

Тӥ асьтэдыс тодосчиен яке журналистэн лыдъяськоды?
Мон тодосчи ӧвӧл, ас вакытаз аспирантураез йылпумъяса, диссертициме пумозяз ӧй вутты. Кужмо журналист но ӧвӧл... «Вордскем кылын», кылсярысь, мон аслым «генератор идей» выллем потӥсько.

Надежда Рысьева

Просмотров: 1758

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Shkljaev Aleksej, Декабрь 8, 2014 в 6:45pm

Нош малы журналын материалъёс ӟуч кылын кулэ?

Кинлэн потэ печатланы журналын аттестация понна мен бырыктон понна удмуртъёс доры вазиськозы.

Комментарий от: Pavel Bazhenov (Buzhy Pavi), Декабрь 8, 2014 в 4:21pm

журнал "Вордскем кыл", действительно, можно было бы в переводе озвучить как "Родной язык" (Однако,  в журнале публикуются материалы не только по языку. Это и литература, краеведение, дошкольное образование, научные и методические материалы для довузовского образования). Родное слово - не мной придумано. Для полемики, конечно. можно замусолить вплоть до английского варианта.

Комментарий от: Niimshur, Ноябрь 25, 2014 в 11:56am

"родное слово"?  не "родной язык"?

если уж перевод размещать на обложке, тогда почему нет английского варианта? 

Комментарий от: Ortem, Ноябрь 19, 2014 в 5:36pm

Егитъёс туэ уг ни тодо ВК, со "Вордскем кыл" шуыса, соослы "ВКонтакте" матэгес

Комментарий от: Pavel Bazhenov (Buzhy Pavi), Ноябрь 19, 2014 в 5:27pm

Огез номер потиз 1990-ти арлэн пумаз, мукетыз - толэзь талэсь азьвыл... дыр виссы  - 24 ар))) Журналлэн чуказеез пумысен вераме уг поты: УдГУ-ысь удмурт филология факультетын югдур азьпала улон шоры учконэз ожыт сермета(((

Комментарий от: Ortem, Ноябрь 19, 2014 в 5:11pm

100% шонер малпанэз:

Но али ведь дышетоно-а ӧвӧл-а удмурт кылэз – быръе директор. И со умойтэм, мон сямен. Малы ке шуоно тросэз аналтӥсько – асьмелэн калык дышемын: уг ке косо, сое кароно ӧвӧл. Та муген но, дыр, пӧртэм валэктонъёс шедьтыса, кыллэсь куштӥсько: пиналлы секыт шуо - ЕГЭ-лы дасяськоно, нош удмурт кыл дырзэ гинэ быдтэ. Та шонертэм. Кызьы ке вылӥысен та ужез радъяны кулэ.

Пусъёс

© 2021   Created by Ortem.   При поддержке

Эмблемы  |  Сообщить о проблеме  |  Условия использования