Uralistica

www.kazak-of-sky.ru

20-тӥ шуркынмонэ Удмурт кун университетын "Интернет: с чем его едят" конференция ортчиз, кудизлэсь тунсокогес ужрад номыр но мынам улонам ӧй вал на! Ужрадэз радъяз Ижкарысь но Удмурт Элькунысь тужгес но кужмоез Интернет-технологиосъя азьветлӥсь - Центр высоких технологий (ЦВТ). Ижкарлы таӵе аспӧртэмлыко ужрадъёс та дырозь радъямын ӧй вал на, мар шуонэз, Ижкар - со провинция, кудаз ке али гинэ сайканы кутско Интернет пыр лэсьтӥськись бизнес-амалъёс.
Озьы ке но, сайт пыр регистрация ортчизы 460 адями, соос полысь тросэз конференцие лыктыны быгитӥз ик.

Центр высоких технологий та ужрадэ доклад лыдӟисьёсы ӧтьыны быгатӥз:

1. Mail.ru-ысь (таиз интые вераськын кулэ вал одӥгез, но вераськиз мукетыз)
2. Яндексысь
3. 1C-Bitrix-ысь (таиз интые вераськиз ЦВТ-лэн ик ӧнерчиез, Мускоысьез висьыны усем, пе)

ӧнерчиосыз, соин, малпасько, ужрад сыӵе яркыт но меӵкыт пӧрмиз. Конференцие пырон вал дунтэк, отчы сюрон понна www.udmsite.ru сайтын регистрация гинэ ортчоно вал. Ужрадэ ӧтемын вал пыриськыны:

* кивалтӥсьёс,
* маркетологъёс,
* рекламая ӧнерчиос,
* PR-ӧнерчиос,
* бренд-менеджеръёс
* но ваньмыз соос, кин тырше серметаны интернетэз аслыз барыш поттон понна.


Конференциез усьтӥз ЦВТ-лэн директорез Олег Вылегжанин. Со вакчияк вераз, ужбергатонлэн вотэсэ выжемез сярысь, кызьы со будоз, кыӵе шуг-секытъёс кылдозы та удысын, но кыӵе перспективаосыз вотэсэсь ужбергатонлэн.

Ольга Завалина, ЦВТ-ысь вузкаронъя менеджер вераз, мар со сыӵе сайт, кыӵе луо сайтъёс функциоссыя, малы кулэ сайт но кыӵе движокъёсын (CMS) луэ сайт лэсьтын.

Дмитрий Кораблинов, ЦВТ-лэн валтӥсь разработчикез, лыдӟиз 1С-Битрикс CMS сярысь доклад. Паймымон вал соиз, ЦВТ сайтъёс лэсьтэ асьсэ системаен (Content master) но Битриксэн гинэ. Joomla усьтэм кодэн системаез уг гажало. Туж тросэзлэн конференциын пукисьёс таин соглаш ӧз луэлэ, малы ке шуоно, тросэз соос пӧлысь лэсьто сайтъёс Joomla CMS-эн. Та движокен лэсьтыны луэ туж ӟеч, чебер но тужгес но дунтэм сайт, коньдонэн басьтэм CMS-ъёсын (Content Master, 1С-Битрикс) ӵошатыса.

Мария Шабалина, ЦВТ-лэн веб-отделэзлэн кивалтӥсез, туж пайдаё тодон-валан сётӥз договор кылдытонъя кусыпъёс сярысь, сайтлэн концепциез сярысь.

Ксения Докучаева, ЦВТ-лэн дизайнерез, ӟеч веб-дизайн кылдотын сярысь мадиз. Зэмос художниклэн сямен вал туж яркыт но йыр вийыме пыӵась презентациез, кудаз ке сайт чошатӥське чебер нылашен. Скелетэн солэн, пе, сайтлэн структураез, сильвирез - программирование, куэз - дизайн, но вылдӥсез - контент.

Наталья Шаботина, ЦВТ-лэн клиенъёслэсь шуг-сеытъёссэс сэрттон-пертчонъя отделлэн кивалтӥсез, вераз, кызьы сайтэз пыриськисьъёслы тунсыко кароно шуыса.

Но конференцилэс нырысетӥ люкетсэ йылпумъяз Олег Вылгжанин ик, мадьыса, кӧня сылын быгатэ сайт, кызьы лэсьтӥське проектлы смета, кызьы лыдӟиське бюджет. Валэктон сётыны тыршиз юанлы: "Сайт - со коньдон быдтон гинэ, яке вуоно дыре барыш поттонэ коньдон понон?"

Нуназеян дыръя ортчиз кофе-брейк, кытын ке туж ческыт пыжискемъёсын (перепечъёс тужгес но ческытэсь вал) сюдизы, нокин сютэм ӧз кыльы кадь.

Кофе-брейк бере пыриськисьъёсыз возьма вал конференцилэн тужгес но пӧсьгес но тунсыкогес люкетэз. Сое нош ик кутскиз Олег Вылегжанин, "Интернет: Маин сое сиё" докладэныз.

Алла Мурлыкина, Яндексысь партнёръёсын ужанъя отделлэн нуись менеджерез, вакчияк вераз, кыӵе реклама вань интернетын, солэсь цельёссэ, задачаоссэ, мае возьмано, мар понна коньдон тыроно. Эшшо вераз но трос-трос терминъес, кудъёссэ ке одно ик тодыны кулэ котькуд интернет-рекламаен вырись ӧнерчи.

Леонид Николаев, Mail.ru-ысь директ-проектъёсын кивалтӥсез, мадиз Mail.ru порталысь рекламалэн аспӧртэмлыкъёсыз сярысь.

Алла Мурлыкина ик азьланьтӥз аслэсьтыз мадёнзэ но вераз Яндекс.Директ арбери сярысь - солэсь ужан амалзэ.

B. Brain выль малпанъёсъя агентство вераз аслаз люкам тодон-валанъёсыз сярысь, кызьы лэу журналъёсыз интернет пыр гинэ реклама лэсьтыса чик коньдон куятэк вӧлмытыны. Туж тунсыко луысал та докладэз кылзыны "Инвожоослы" но "Удмурт дуннеослы" :)

Дарья Васильева, ЦВТ-ысь Интернет-рекламая ӧнерчи, мадиз вирус маркетинг сярысь. Та амалэз кутын луэ пичи гинэ коньдон куштыса, но солэн чик но пайдаез луыны уг быгаты. Соин ик вирус маркетинген вырыны луыны кулэ бадӟым опыт но мур тодон валан, лэсьтыны озьы, тужгес но трос адямиос интернет пыр мед "черлалозы" шуыса со "вирусэн" но мед келялозы ог-огзылы "вирус черен" видеороликъёсты, сульдеръёсты но мукет, кудъёсаз вань ватскем рекламаез.

Дмитрий Плетенев, ЦВТ-ысь SEO-менеджер, вакчияк вераз утчаськон оптимизация сярысь (SEO), мар со сыӵе SEO но кызьы сое ужбергатӥсь аслаз ужаз.

Вакчияк вераса, конференция туж пайдаё ортчиз быдэс Ижкарысь рекламая но сайтъёс лэсьтонъя ӧнерчиослы. Туж бадӟым шумпотон вал, Яндексысь но Битриксысь ӧнерчиос Ижкаре вуыны быгатӥзы шуыса. Ижкарысь ӧнерчиослы трос дышетскыны кулэ на ай, соос сямен презентация лэсьтын но асьсэды сцена вылын возьыны)

Та конференция, оскисько, луоз нырысетӥ вамыш Интернет-ужбергатӥсьёслы, кудъёсыз выро конференция люканэн. Вуоно дыре, малпасько, таӵе уровенен конференциосы пыриськон дуныны сылоз, но соин ик воштӥськоз соослэн качествозы но - ужрадъёслэсь тематиказэс сюбегатын луоз. Оскисько, вуоно дыре удмуртъёс но ӝогак дышозы вань та Интернет-технологиосын вырыны но юн-юн интыяськозы интернетэ, асьсэлэсь кылдытэм малпанъёссэс быдэсмытыны!

www.kazak-of-sky.ru

Просмотров: 97

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования