Uralistica

Кедра Митрей сярысь лыдӟымтэ докладэ

Туннэ, 29-тӥ куарусёнэ, Кедра Митрейлэн, нырысетӥ удмурт прозаиклэн но драматурглэн, вордскем дырыcеныз 122 арес. Кемалась ӧвӧл Кедра Митрейлэн вордскем нуналэзлы но удмурт литературалы сӥзем ужрадэ ветлӥ. Сое кык арлы огпол Эгралась ёрос лыдӟиськонниысь ужасьёс ортчыто. Мон докладме удмурт кылын гожтӥ вал. Жаляса верано, Эгра посёлокын тросэз нылпиос удмурт кылэз уг тодо, уг дышето. Соин школаын но ёрос библиотекаын но ӟуч кылын вераськоно луиз. Дасям докладме татысь лыдӟыны быгатӥськоды.

Мынам нимы Лариса Дмитриева, гожъясько Кедра Митрейлэн революцилэсь азьло улэмез но творчествоез сярысь. Озьыен, эскеронэ герӟаськемын Кедра Митрейлэн егит дыреныз.

Тодос ужелы тема утчакум, тодам вози творчествоен улӥсь адямиосты. Мон котьку но паймисько вал та огшоры дуннеез, мон понна номырин но пусъёнтэм пурысь нуналэз соослэн мур пуштросо, тунсыко возьматыны быгатэмзылы. Творческой адями улон сямзэ аспӧртэм радъяны быгатэ. Мынам возьматэме потэ вал аслам ужам, кызьы улон но творчество куспазы герӟаськемын, кызьы улон творчестволы пӧрме, нош творчество – улонэ выже.

Нырысь малпасько вал туала егит писательёс сярысь гожтыны. Соосын мон быгатӥсько пумиськыны, вераськыны. Но, кылбурчилэн верамезъя, «лицом к лицу лица не увидать, большое видится на расстояньи». Литературоведлы писательлэсь творчествозэ котыр ласянь дунъяны умойгес, дыр ортчыса. Кедра Митрейлэсь автобиографической повестьсэ эскерыны ӵектыкузы, соглаш кариськи. Аслэсьтыз улэм-вылэмзэ со литературае пыртӥз, огшоры улон-вылонэз но искусствоез герӟаз.

Кедра Митрей сярысь гожъязы трос тодосчиос но писательёс, Кедра Митрей сярысь малпан кылдытӥзы – со удмурт лулчеберетмылэн батырез. Нош мыным тае выльысен валаны кулэ: мар со лэсьтӥз, таӵе ним сётон понна. ..  

Озьы мон нырысь-валысь тодматскыны кутски Кедра Митрейлэн биографиеныз. Огъя вераса, улон-вылонэзлы но творчествоезлы аслым валамон модель лэсьтӥсько.

...Эграын но Зураын улэмез тодмо Кедра Митрейлэн гожъямъёсаз но ӵыжы-выжыосызлэн мадемзыя. Кедра Митрей вордӥськыку семьяяз мумы-бубыез Анна но Иван, Надя апаез, Александр песятаез но Прасковья песянаез вылэм (Озьы со пусъе классын гожтэм сочиненияз). Песянаез Митреез пужъятскыны дышетэм. Нош песятаез сярысь тодэ ваёнъёсыз берлогес Кедра Митрейлэн быдэстымтэ «Дитя больного века» романаз пырозы.

 Корепановъёслэн семьязы нырысь-валысь узыр улэм. Юлия Дмитриевна Данилова, Кедра Митрейлэн Надя акаезлэн нылыз маде:

«Корепановъёслэн юртъерзы сылӥз бадӟым сюрес вӧзын ик… Соин но пырась-потась отысь ӧз бырылы – уйзэ шутэтскыны, кӧлыны кытын ке кулэ ук. Син шоразы йӧтылӥз, вылды, улон-вылоннизылэн пасьтана вӧлскемез но: отын ик корка, кенос, коргид, вуко, мунчо. Вылаз ик – маке быдӟа азбар. Кутсаськон машиназы но вал. Кеносазы тыраз – дэра но басма кесэгъёс… Митрей ӵужмуртлэн мумы-бубыосыз вордӥзы кык скал… сомында ик вал, маке мында ыж, курег» [Лаптев 1992].

1906-тӥ арын Эграын тыл потэм, Кедра Иванъёслэн но юртъерзы ӝуам.  Семьязы куанермем. Соку Митрей Зураысь кык классъем училищеын дышетске ни вал. Митреез куанер студентъёс пӧлы пырто но огъяулонниын инты сёто. 

Зура училищеысь дышетӥсь Алексей Алексеевич Смирнов  дэмла Митрейлы Кузонысь дышетӥсьёсты дасясь семинарие пырыны. Семинариялэн аспӧртэмлыкез – та дышетсконниын ӟуч луисьтэм пиналъёс понна дышетӥсьёсты дасязы.

Нимысьтыз верам потэ Смирнов сярысь. Кедра Митрейлэн дышетӥсез 1915-тӥ арын Заякинской кедр арама пуктӥз. Со пыртэмын инкуазь синпелетъёс пӧлы, нош 2010-тӥ арын кедр арама «Семь чудес финно-угорского мира» конкурсын «Инкуазь» номинациын вормиз. Мынам малпамея, дышетӥсезлэсь ик адӟем карыса, Кедра Митрей юртъерез котыре сад мерттӥз. «Позади куалы виднеется верхушка рябиночки.  Ее уже я сам посадил. рядом с нею много черемух, рябин, есть даже ива одна, малинник, смородина и крыжовник, все посажено мною. Вот это еще дороже для меня; этим «маленьким, молодым садиком» горжусь» [Кедра Митрей 2005: 140]. Малпасько, со садэныз данъяськем таӵе мугъя но: кызетӥ даурлэн кутсконаз гуртысь крестьянъёс сад мерттонъёсын нимысьтыз ӧз выре. 

1. А. А. Смирнов

Кроме меня, - гожтэмын повестьын, - в Казанскую семинарию готовились еще двое» [Кедра Митрей 2005: 139]. Митреен ӵош семинарие пырыны дасяськизы Спиридон Усков (туала Кез ёросэ пырись Полом гуртысь) но Зураысь ик пияш Александр Корепанов. [См.: НА РТ. Ф. 93. Оп. 1. Д. 877. Л. 28].

Гожтэмын, Кедра Митрей 400 иськем сюресэз пыдын ветлэм шуыса, семинаристъёс Кузонэ арняен-кыкен мынӥллям, пе. Нош Кедра Митрей дышетскон сочиненияз гожтэ: «Приемы в семинарию начинались с 16-го августа, и я должен был к этому времени прибыть в Казань. Решено было мной выйти из дому 11-го августа» [Книга 1: 191]. Озьыен, сюрес вылэ ог вить нунал ик кошке вылэм. Эграысен потӥллям Чепца станцие. Отысен, поездэ пуксьыса,Пермь карозь мыныны кулэ вал. Пермьысен Казане пароходэн ветлылӥллям. Юлтошъёс Казаньтӥ гинэ но трамваен мыно вылэм.

Александр Корепановез семинарие ӧз кутэ, сочинениезэ туж ляб гожтӥз. Спиридон Усков экзаменэз кыкетӥ ползэ гинэ сётыса пыриз. Митреез но кутӥзы, арифметикаен задачаез понна «кык» басьтӥз ке но. Солэн сочинениез «вить»-лы гожтэмын вал, эшшо "ньыль" басьтӥз ватсаса сётэм экзаменъёсын – географиен, историен но удмурт кылэн.

1907-тӥ арын Казаньысь учительской семинариын дышетсконэз кутскиз. Семинариын дышетӥзы ӟучъёсты, удмуртъёсты, поръёсты, эрзя но мокшаосты, чувашъёсты но крашинъёсты тодмо просветительлэн Н. И. Ильминскийлэн амалэзъя. Ильминский ӟуч кылэз тодӥсьтэм муртъёсты асьсэ кылэнызы дышетоно шуэм.

2. Семинарилэн юртэз интыяськемын Старо-Татарской слободаын, Нижний Кабан ты дурын

(Ш. Марджани ульча, 26-тӥ юрт).

Со вакытэ семинарилэн юртэз вужмемын ни вал, нош дышетскисез трос. Тани мар гожтэ директор Воскресенский. «Классы .. не имеют достаточно света… Спальни школьников, приготовительного и первого класса тесны (часть учащихся должна спать даже в коридоре), а угольные спальни холодны, потому что оконные рамы вообще во всем здании ветхи и не держат тепла… Здание не белено снаружи, имеет проржавевшую давно некрашеную крышу.., избитые стертые полы, давно не ремонтированные облезлые рамы и двери.». [НА РТ. Ф. 93. Оп.1. Д. 894. Л. 20]. Бен, семинарилэсь юртсэ тупатыны уксё  тырмыт висъяллямтэ, но нылпиосты сюдӥллям-дӥсятӥллям казна уксёен.

(Семинариез ворсаны мылкыд карисьёс котьку вал. Кузонысь куд-ог профессоръёс ӟуч луисьтэм нылпиосты анай кылэн дышетоно ӧвӧл шуиллям. Та семинариен сэрен бигеръёс крашинысь исламе пото, пе. Но Ильминскийлэн дышетон амалэз понна дурбасьтӥсьёс кужмогес вылӥллям. Учк. : Исхакова Р. Р. Педагогическое образование в Казанской губернии во второй половине 19 - начале 20 вв. : дис. докт. педаг. наук. Казань, 2002. )


3. Cеминариялэн 3-тӥ этажез. Али та юртын интыяськемын Казаньысь технология но дизайнъя колледж.

Семинариын дышетскон Кедра Митрейлы бадӟым пайда ваиз. Солэн дышетӥсьёсыз – удмурт педагог Иван Степанович Михеев, чуваш тюрколог  Николай Иванович Ашмарин, эрзя но мокша югдытӥсь Макар Евсевьевич Евсевьев но мукетъёс.

Семинариын нимысьтыз инородческой занятиос ортчо вал. Котькуд дышетскись аслаз анай кылэзъя уроке ветлӥз. Удмурт семинаристъёсты Михеев дышетӥз.   Соос тодматскизы удмурт кыллэн грамматикаеныз, этнографиеныз, ӟуч кылысь удмурт кылэ берыктӥзы православной вӧсяськонъёсты. Семинаристъёслы одно ик трос сочинениос гожъяны сёто вал. Кедра Митрей гожтэтаз но, повестяз но пусъе автобиографической темая сочинениосты мыло-кыдо гожъямзэ. Та сочинениосыз тросэз ик пыризы «Дитя больного века» повестьлэн текстаз. Озьы ик семинариын гожтэм ужъёссэ со мӧйы писатель луэмез бере но кутэм. Кылсярысь, «Шӧртчи Онтон» (1931) веросын ӵук мунчо уй (Великий Четверг) сям-йылол возьматэмын. Нырысьсэ та йылол сярысь Кедра Митрей гожтэ дышетскон сочиненияз: «Хозяйка всовывается до поясницы в окно избы с дворовой стороны и зовет домашних животных и птиц; так напр., тпрсё, тпрсё! (лошадь), тпруе, тпруе! (корова), чиге, чиге! (овца), диго, диго! (гусь) и т. д. Говорят, если будешь звать таким образом, то скот домашний размножится» [Книга 1: 200].

Вакчияк верало «Дитя больного века» повесть сярысь.

Повесть кылдытонлэсь азьвыл Кедра Митрей дневник нуэм, собере ини, 1910-тӥ арын, автобиография гожтыны кутскем. Автобиографиез бордын трос ужаса, художественный вымысел пыртыса, со куинетӥ вариант гожтэм ини. Сое, кудзэ  критик Алексей Ермолаев шедьтэ Ленин нимо библиотекалэн закрытый фондысьтыз но 1965-тӥ арын «Избранное» книгаын «Дитя больного века» нимын опубликовать каре.

Жаляса верано, повестьлэсь рукописьсэ мон ӧй шедьты на. Шедьтӥ автобиографиезлэсь пичи отрывоксэ. Сое но печатлам повестез ӵошатыса, валай, макем кужмо Кедра Митрей автобиографизэ сэзъям но автобиографической материалэн кылдытэм чеберлыко произведение. Озьы, луэм учырез басьтыса, писатель солэсь пуштроссэ воштэ, аслэсьтыз малпанзэ яркытгес усьтон понна.

Ӵошатом Смирнов дышетӥсь сярысь гожъямъёссэ. Сочинениосаз со дышетӥсезлы тау каре, Смирновлэн семинарие пыртыны юттэмез сярысь вера. Нош кызьы дышетӥсь суредамын повестьын? Смирнов кык эпизодын возьматэмын. Дышетӥсь черке службае ветлыны косэ, нош ачиз уг мыны. Озьыен, со но Инмарлы уг оскы. Мукет эпизодын со Митрейлэсь лушкем малпанзэ шарая. «Тонэ семинариысь ӧз уллялэ на мар-а?» - юа Смирнов Митрейлэсь. Дышетӥсьлэн образэз пыртэмын «семинариысь уллян» мотивез кужмоятон понна.

Кедра Митрейлэн творчествоезлэн огез яркыт тодметэз – со автобиографизм. Со гожъяз аслаз улонэз сярысь, чеберлыко ужъёсаз зэмос луэм учырез пыртӥз но улонысь фактъёсты выль сямен улӟытӥз.   

 

Литература но источникъёс

Кедра Митрей. Дитя больного века // Инвожо. - 2005. - № 9-10. - С. 137-194. 

[Корепанов, Д. И. Книга 1-я. Тетради по чистописанию, русскому языку, всеобщей истории, Закону Божию  и др. м. пр. ] // Архив факультета удмуртской филологии Удм. гос. унив-та. [364] с.

Лаптев, А. М. «Пие, калыкын астэ умой возь...» // Ӟечбур. – 1992. – 29 пӧсьтолэзь.

НА РТ. Ф. 93 (Казанская учительская семинария). Оп.1. Д. 894.

НА РТ. Ф. 93 (Казанская учительская семинария). Оп. 1. Д. 877.

Туспуктэмъёс
1. А. А. Смирнов. Фото № 543-НВ ИКМ/ЗМ (Музей им. С. М. Стрелкова, с. Зура )
2. Казаньысь дышетӥсьёсты дасянъя семинария. Фото: Айрат Ибрагимов.
URL: http://static.panoramio.com/photos/large/50751809.jpg
3. Фото: Mark Shishkin. URL: http://www.panoramio.com/photo/85072498

Просмотров: 634

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования