Uralistica

Малав иеде ламо ютась се шкастонть, зярдо мон карминь содамо «ВКонтакте» эрзянь кельс ютавтомадо. Те кулядонть монент ёвтась Питерсэ эриця эрзянь содавикс цёрась Петрянь Андю.  Сестэ мон карминь содамо эрзянь  Википедиядонтькак (эрзякс Вий кепеди). Ансяк аволь сондензэ ней моли кортамось.

Мон максынь зярыя кевкстемат «ВКонтакте» ресурсонть ютавтомадо Петрянь Андюнень.

 

– Шумбрат, Андю! Неень шкане эрзянь, финнэнь-угрань ломантне пек сеедьстэ кевкстнинь «ВКонтакте» ютавтомадонть.Ёвтык миненек, мейстэ веси ушодовсь?

– Шумбра чи весенень! Те тевенть ушодыя мон, малав кавто иеть ютасть. Кевкстия ломантнень, конат аштить келень пельксенть «ВКонтакте», максынь вешема-конев, тосо максть «пиже тюс» те тевентень. Истя веси ушодовськак.


  Сестэ истя мертяно, те тонть «эйкакшось», эрзянь кельсэ «Контактсо» интерфейсэсь?

– Контактось эрзянь кельсэ – те весинь ды вейсэнь тевесь. Мон ансяк ушодыя ютавтомань. Аздан мекс, тень коряс а арсить келень содыцятне Мордовиясто, лиякс меремс лингвистнэ?!

Кода арсят, кодамо лезэ максы «Контактсо» эрзянь раськентень, эрзянь келень касомантень?

– Покштояк покш! Кевкстемасонть – каршо валоськак. Мезе ломанентень максы келень касомась? Педе пес улемс ломанекс, келень содамось панжи од кить вишка шкасто. Контактсо – сехте покш ды вечкевикс Россиянь келесь совсема тарка. Од ломантне веси тесэть. Эряви интернетэнть вельде, веси одонть вельде кастомс-кепедемс мель тонавтнемс, содамс ды вечкемс минек мазый эрзянь келенек! Истя жо те проектэнть вельде эрзянь келесь сюпалгады од валсо, неологизмасо.

Сехте прявт ютавтыцятне-важодицятне: Андрей Петров, Джак Рютер, Александр Учеваткин.

– Пек паро. Меельце кевкстема. Ламо лездыцят-ютавтыцят?

– Пек ламо лездамо теи Джак Рютер, ней вана тон (Учеватонь Сантяй) покш лездамо теить ды теят. Лиясто совсить од ломанть, ютавтыть зярояк ды тень лангс сынст виест-мелест мадить.

– Сюкпря, Андю ялгай, истямо домка кортамонть кисэ. Арсян, «Контактсо» эрзянь кельсэ ютавтови ды карми вечкевикс од ломантненень.

– Сюкпря, ялгат. Эрьва мезесь изняви, бути минь, эрзятне кармить тееме тевть, аволь «човсеме валт». Вейсэ, ансяк вейсэ эрзят, виевтяно!

 

Ёвтаса видьстэ, аволь сеске парсте карминь важодеме «Контактсо»-нть лангсо. Валонь ютавтома тевесь марявсь покш канстокс, секс мекс пек кияк эзь ютавто. Ломантне совильть ютавтомо ды шкань ютазь кадылизь те тевенть. Арасель пурназь вейсэндявкс, конась кедьте кундазь топавтоволь те тевсэнть. Арасель кодамояк нежедемань, лездыця кедъёнкст.

Покш мель ютавтомас сась сестэ, зярдо якинь тельня Удмуртияв ды маринь куля: удмуртонь Контактось ютавтовсь! Сеске кенярдынь удмуртнэнь кисэ ды секе марто седейсэнть теевсь апаро сень кис, мекс эрзянь ломантнень арась эрзянь кельсэ сон ды мекс миненек кодаяк а топавтови те тевесь. Се шкастонть саезь карминь седе пек важодеме те проектэнть лангсо. Лиясто лезэ учомс а косто, веси ансяк минек кедьсэ.

Сехте прявт стакачитне ульнесть истят:

1) арасель терминэнь валкс;

2) арасель вейсэнь важодема;

3) стакачить од валтнэнь ютавтомсто.

Неть стакачитнень изнямс лездась вейке пряс сазь мелесь – теемс валкс, конанть лангс нежедезь карми седее шождасто важодемс весенень. Эдь кой-кона валтнэ стувтовить: течи ютавтсак истя, ванды лиясь сёрмадсы сонзэ лиякс, вандыдемейле – тунь стувтови. Истя, Word тевконёвонть лангс карминь сермалеме рузонь валт-терминт ды мельгасть кода карми эрзякс. Истя чачсь лездамонь валкске. Те валксонть кучия Петрянь Андюнень. Сон ёвтась мель, пурнамс веси «Контактонь» валтнэнь ды нолдамс валкс, косо кармить улеме весе чарькодематне. Седе тов лездамс ёвтась Зинёронь Сантяй, сонензэяк кучия.

Эряви меремскак оштё вейке стакачиде: весемезэ ютавтомс сави аволь 12000 валт. Соват, ютавтат, а ковонь ютазь вачтат, тосо седеяк ламолгадыть чарькодематне. Эрьва чи теевить од сервист, чачить од  лопат ды валт. Истя  сынь ламолгадытькак. Ды чарькодематнеяк лиясто аштить зярыя валрисьместэ.

 

 

Бути ней вачтамс «Контактсо»-нть лангс, минь нейсынек, весемезэ ютавтозь 89%. Лиякс меремс, лиядсь 1341 валт ды валрисьметь. Ансяк лиядсть сехте стакатне. Кемдяно, те иень перть минек важодемась, конантень максозь ламо вий, карми неявомо ды панжадо весенень. Тень минь тейдяно аволь ярмак кис, тень кис кияк а панды! Весененть тейдяно эрзятненень, эрзянь келень касоманть кис. Сехте питней пандомакс миненек кармить эрзянь кельсэ кортыцятнень, сёрмадыцятнень пельде седейшкава ёвтазь сюкпрятне.

 

Учеватонь Сантяй

Просмотров: 428

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Кувакань Азор, Август 20, 2011 в 11:53am
Мон истя арсян, мейле од валт кармить, эрьва чись.
Комментарий от: PaoL, Август 19, 2011 в 11:09pm
А вана бути весе, 100% валт ды терминт кармить ютавтозь, сестэ мезе, сынь ламолгадомо а кармить?
Комментарий от: Santjai, Август 19, 2011 в 6:57pm
Ней лиядсь ютавтомс 92 %)
Комментарий от: Кувакань Азор, Август 19, 2011 в 6:56pm
Эрзякс кортатадо, мезе кортамс... Паро цёрат!!!
Комментарий от: Кувакань Азор, Август 19, 2011 в 6:55pm

Шумбратадо, ялгат! Вай, кодамо парсте! А зняро ютавтомс оштё валт? Невтемксэсь, %-сэ?

Вейсэ, минь ансяк виевтяно!

Комментарий от: Santjai, Август 19, 2011 в 6:36pm
Сюконян паро валот кис, Эрюш леляй!
Комментарий от: Erush Vezhai, Август 19, 2011 в 6:24pm

Пектеяк пек паро тев тейтядо, ялгат! Инешкипазось лездассо тенк! Валдо мельть ды паро тевть тенк!

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования