Пирсатэм парсь сӥль Ӟаӟа сямъя

Берло дыре мыным китай сиён юн яраське.
Та сиёнэз ӵош улэм эшелэсь, Китайын быдэ вуэм но али Хельсинкиын дышетскись Ӟаӟа нимо нылашлэсь, пӧраны  дыши. 

Озьыен,
Тӥледлы кулэ луоз:
- кӧё парсь сӥль, куэныз валче
- пӧртэм пумо специос: анис, имбирь, курыт горд пӧсьтурын, сычуань пӧсьтурын,
- порей сугон - котрес вандылыса, одӥг бадӟым пуньы, пӧсьвуам вож сугон шашыен но воштыны луоз.
- чеснок - 2-3 пинь
- губи - Китайысь шиитаке яке асьмелэнэз, кылсярысь, мон ӵемгес опятаен лэсьтылӥсько
- картопка - 2-3 пыдэй (диал. клубень)
- рис нугыли - 100 грамъёс (эшшо но тупасьгес коньыт картопкалэсь, батутлэсь, нугыли)
- сакыр, умойгес кристалл выллемзэ
- сылал - ас шӧмдыя
- нап соя веттэт (соус) - 3-4 бадӟым пуньыос
- сима вӧй - 2-3 бадӟым пуньыос
- быректэм шуныт ву

Ачим мон мертатэк лэсьтӥсько, ялан шӧмъяса.

 Пӧран радыз таӵе:

Табаын сакырез ялан сураса шунтоно.

Шунамез бере пӧлы пасьта сӥль юдэсъёсты ватсано но 2-3 пуньы мында сима вӧй, сурано.

Вылаз ик ватсано вань специосты, сугонэз, чеснокез, соя веттэтэз но чепыльтэт сылал.

2 минутъёс дугдылытэк сураса улоно. Кулэ дыръяз, вӧйды быре ке, быректэм шуныт ву ватсалэ, 3-4 бадӟым пуньылэсь трос кулэ ӧвӧл. Пыдсэт улын 10-15 минутъёс мед пӧзёз.

Куспаз нош картопкадэс юдыса дасялэ, нугылидэс но шиитаки губиез вуэ коттыса 10 минутъёслы кельтэ.
Табере картопкадэс ватсалэ,

кӧня ке небӟемез бере -  губидэс.

5 минутъёс вуэмез азьпал сиёнады небӟем нугылидэс понэлэ. Умой суралэ но сиёнды вуытозь (картопка, нугыли но губиды небӟытозь) тыл вылын возелэ. 

Ческыт мед кошкоз!