Uralistica

6 шуркынмонэ Fashion клубы «Пукро» пати ортчиз. Мар со Пукро но малы клубын ортче? Ӝытэз радъясьёс TUZI&TODMO но «УЛОН-ВЫЛОН» промо таӵе валэктон сётӥзы: «Пукро – со Покров, удмурт Хэллоуин порма: таӵе вакытэ удмуртъёс пӧртмасько, коркась корка ветло, дӥсьсэс мыддорин дӥсяло. Юртэз толалтэлы дасяны кутско.» Паймоно кадь, таӵе ӝытэ калык но люкаськиз. Озьыен, туала егитъёслы вашкала сям-йылолъёссы тунсыко, соос кыстӥсько бордазы. Угось Fashion-ын кемалась тамында калыкез ӧй вал ни: кинлы ке та клубысь удмурт диджейёслэн шудэмзы уг кельшы, нош кин ке клублэн кыдёкын луэмезлы ӝожтӥське. Маин меда паймытӥз калыкез Пукро диско? Пӧрмытӥзы-а радъясьёс герӟаны удмурт йылолэз туала шулдыръяськонэн?

Гриша Григорьев, удмурт шрифтъёсты вӧлмытӥсь:

Гуртын пукыса жади ни вал, соин кытчы ке калыке потаме потӥз. Шулдыръяськон пӧртмаськон ӝытлы туж ик ӧз кельшы кадь, малы ке шуоно мон асьсэдыз пӧртмаськисьёсты ӧй адӟы. Но калыкез трос вал. Малы ке но туж ик ӧз кельшы крезьгур, оло drum'n'base ӧй вал шуыса. Но рок лэзьязы шуыса, диджейёслы «гажан».

Егор Тополев, Шаркан ёрос:

Быдэсак «Пукро» пати лябгес потӥз, Пукро темая конкурсъёс ичигес вал. Собере кызьы ке но лэсьтыны луысал "дрес-код": кин пӧртмаськон дӥсен вуиз, солы пырыку скидка яке пыронэз воксё уксё сетытэк. Выступлениос ичигес потӥзы, кинэ ке кырӟасьёсты луысал поттыны, юри калыкез шулдыртыны. Куд-ог номерьёс бен туж кельшизы ик. Пусъемэ потэ "бит бокс" шудӥсь пияшез. Бордаз удмурт реп луысал кырӟаны. Шудӥсь крезьгур но кырӟанъёс быдэсак ӧз яралэ, ӟуч кырӟанъёс лэзьязы шуыса. Удмурт пати бере - удмурт крезьгурьёс луыны кулэ, малы ке шуоно суро-пожо луэ ке, огъя удмурт атмосфераез залысь сураське. Одӥг пол лач-лач зол лэсьтоно но, калык тросгес но тросгес ветлыны кутскоз!

Настя Гусева, ФудмФ, 5 курс:

Кельшиз ачиз малпан, таӵе ӝыт ортчыто шуыса. Удмурт йылолэз тодэ ваён кадь. Эсьмаса тодӥсьтэм калык табере тодэ, сӥзьыл пӧртмаськон но вань шуыса. Кельшиз калыклэн мылкыдыз - капчи но шулдыр, конкурсъёс - тунсыкоесь, музыка – кельшись, но пӧлаз ярасьтэмез но сюрылӥз... Но татын ваньмызъя уг луы карыны, кодькудӥзлы пӧртэм гуръёс кельшо ук. Ми эшъёсыным вань мылкыдмес поныса позыръяським, со монъя быдэс ӝытлэсь пӧрмемзэ но возьматэ. Быдэсак ӝыт кельшиз, мылкыдмы лӧптэмын вал, нылъёсмы но туж умой шулдыръяським, шуизы! Тау та ӝытэз лэсьтӥсьёслы!

Но Fashion-ын эктон интыез ичигес, крезьгур но ӵемысь туж уг кельшы. Дэмласал ӵемгес пуктылыны сыӵе крезьгурез, кудӥз пукыны уг сёты, пыдъёс асьсэос кылзӥськытэк эктыны кутско.

Фото: Мария Золотарёва

Просмотров: 482

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Lusha, Ноябрь 10, 2012 в 11:27pm

Бен, шулдыръясько, кинлы со тунсыко. Нош кин Пукро сярысь тодӥз, соосыз Fashion-ын вал. Кылем арын удмурт Хеллоуинэ (Fashion клубе ик!) тамында калык ӧз люкаськы, кӧня туэ Пукрое (со клубе ик). 
Но ужпум мукетаз, сӥзьыл пӧртмаськон сярысь ивор но ичи ук. Вот тол пӧртмаськонэ кӧня мурт пыриське! 

Комментарий от: Ortem, Ноябрь 9, 2012 в 10:56am

Хеллоуин сярысь ваньзы тодо, шонер овол-а меда? уг-а шулдыръясько Ижын та нуналэ Хеллоуин пусйыса меда?

Комментарий от: Lusha, Ноябрь 9, 2012 в 12:41am

Собере тае ик тазьы но валаны луэ: Хеллоуин но, Пукро но одӥг выллемесь. Соин ик мурт макеын шулдыръяськон интые, аслэсьтыдзэ удмуртсэ бырйыны луонлыкед вань.

Комментарий от: Lusha, Ноябрь 9, 2012 в 12:39am

Соглаш ӧвӧлгес тонэн, Хеллоуин сярысь нош кытысь тодоно? Нырысь ик пиналлы Хеллоуинэз пӧртмаськон йылолэн ӵошатыса возьмато. Милемлы дышетӥсьмы озьы валэктӥз вал. Угось ми гурт кузя пӧртмаськыса ветлӥм ай, али уг тодӥськы, ветло на меда озьы гуртамы.

Комментарий от: Ortem, Ноябрь 9, 2012 в 12:33am

валасько, но со туж урод, туала адямиосмы Хеллоуин сярысь мултэс валэктонъёстэк тодо шуыса, нош удмурт йылолэз соослы мурт макеен чошатон пыр тодэ вайытоно

Комментарий от: Lusha, Ноябрь 9, 2012 в 12:26am

Татын Пукро юри Хеллоуинэн ӵошатыса сётэмын, озьы та йылол сярысь тодӥсьтэмъёс коть ӧжыт ке но мед валалозы, малы со тупа, кельше.

Комментарий от: Ortem, Ноябрь 9, 2012 в 12:22am

Хеллоуин, веж Валентинлэн нуналыз - со удмуртъёслы мурт макеос.

Пукро ас вактаз, Хеллоуинэн чошатытэк но, туж кулэ луись но аспортэмлыко йылол нунал

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования