Uralistica

 

Эрьва раськесэ эрсить-муевить истят Ине ломанть, конатне эсест тевсэ ды вийсэ кирвазтить лиятненьгак. Апак кавтолдо ёвтаса, эрзятнень ютксо истямо ломанекс ульнесь
Йовлань Оло. Эсь аволь кувака эрямонь перть сон тейсь а онкставикс лезэ мокшонь
ды эрзянь морамонь икелень койтнень муемантень-ванстомантень, фольклоронтень, раськентень
ды весе модамасторонтень.


Таштамковонь 6 чистэ Вирь Тавла велесэ ульнесь ютавтозь III-це "Торамось терди" кезэрень эрзянь моронь фестивалесь, конась алтазь Йовлань Олонь чачома чистэнзэ
60 иетненень. Валске марто кармасть пурнавомо инжеть «Этно-кудонтень» ды ламот
эйстэст эрзянь оршамосо. Кудонть икеле пуромсть весе сыцятне, прявтнэ-кирдийтне,
радиось, телевидениясь. Фестивалесь ушодовсь кеврунгонь (бюстонь) панжомасо.

Сонзэ теицязо Йовлань Олонь ялгазо Филатов Григорий, конась эсь вийсэнзэ, апак лезда, ярмаконь апак максо теизе кеврунгонь ды казясь Олонень ды весе
эрзятненень истямо покш казне. Панжомс максызь Йовлань Андюнень, Олонь
цёрантень. Тесэ вал ёвтасть раськень политикань министрась А. С. Лузгин, Рав
кужонь финнэнь-угрань прявтось Ю. А. Мишанин, Кочкурбуень прявтось С.Н.
Герасимова, эстониясто инжесь Я. Прозос ды лия содавикс ломанть. Ламо паро валт
ётазельть те чистэнть Олонь лемс, лецтязельть сонзэ Ине тевензэ. Кеврунгонть
вакссо меельцекс вал ёвтась Калаганонь Керяз чувтосто керсицясь, «Этно-кудонь»
прявтось-кирдицясь. Сон тешкстызе,  васенцеде кирдивиесь, властесь лездась
сыненст, мезень кис покштояк покш сюкпря.

Тень пингстэ кармась морамо «Торама» вейсэндявксось ды ломантене сынст мельга ютасть морамо таркантень, косо невтизь эсест ёрокчист. Тевс нолдазельть од альбомсто моротне. А ёвтавикс кенярдома
ломантнень сельмсэ неявсь, весе паро мельсэ кунсолость эрзянь гайтев моротнень.
«Тораманть» поладызь эрзянь морамонь вейсэндявкстнэ Чаунзасто, Игнатбуестэ,
Отяжелестэ, Орданбуестэ, Саранскойстэ, Обран ёндо, Самарасто, Татарстансто… Мик
Удмуртиястояк сакшнось инже Йовлань Олонь лементь кундамо, те ульнесь Надежда
Уткина, конась удмуртонь оршамосо морас мазый морот тиринь кельсэ. А сехте пек
вечкевсь ломантненень Рауткин Видяень, Самарань Овтонть, кода сон лемди эсь
прясонзо, неень шкань моротне. Однэ-сыренек весе киштезевсть. Ды а весть сонензэ
пшкалесть лисемс ды морамс. Самарань Овтонок колмоксть морась мельстуиця эрзянь
морот.


Фестивалесь прядовсь чокшне ёнов. Кувать инжетне эзть тукшно кудов. Кодамо-бути вий вейсэндясь весень. Истямо ине ломанесь, кодамокс ульнесь Йовлань Оло, куломадонзо
мейлеяк теи покш тевть, вейсэнди ломантнень моросо, оймесэ. Вейсэнди ломантнень
кирдивиенть марто, кежевенть чевте ломань марто. Минь а содатанок, витевсь-эзь
Олонь мелезэ минек вастомасонть, арсетяно витевсь. Йовлань Оло, бути мезе аволь
истя, нолдык чумонок, лездак миненек.


Седе вере мон сёрмадынь, «…кодамокс ульнесь Йовлань Оло…». Седе видестэ карми, бути мерян, Йовлань Оло ульнесь, ули, ды пингеде пингес карми улеме. Зярс улить
эрзятне, зярс карми лецтневеме сонзэ лемезэ. Йовлань Оло – эрзянь раськень
чамазо.

Просмотров: 323

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Erush Vezhai, Сентябрь 10, 2011 в 9:01pm
Сюконямот мазый сёрмадксонть кис, эрзя!
Комментарий от: Кувакань Азор, Сентябрь 10, 2011 в 6:38pm
Сюкпря паро валтнэ кис! О, Сантяй Учеваткин Торамасо уш моры :)

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования