Uralistica

Кыӵе ужпумъёсты эскериз Трокай Борисовлы сӥзем конференция

30 шуркынмонэ УдГУ-ын ортчиз межрегиональной тодос конференция «Йӧскалык журналистика туала глобализация но модернизация вакытэ. Тодон-быгатонлык но вуоно азинсконъёс. Трокай Борисовлэн 120 ар тырмемлы сӥзьыса». Та ужрад вал радъямын Удмурт кун университетысь журналистикалэн историезъя но теориезъя кафедраен.

Конференция усьтӥськиз ӟечбуръяськон кылъёсын, кыл сётӥзы журналистика факультетлэн деканэзлы В.А. Байметовлы, «Удмурт кенешлэн» вице-президентэзлы Т.В. Ишматовалы, лулчеберетъя но печатья министырез воштӥсьлы С.Ф. Васильевлы но мукет дано куноосмылы. Татын ик презентация ортчытӥзы Трокай Борисовлы сӥзем «Быдтӥзы ке но, улэп» выль бичетлы.

Со бӧрсьын мынӥз пленар заседание, кудазын вал лыдӟемын кӧня ке докладъёс. Одӥгез соос пӧлысь журналистикалэн историезъя но теориезъя кафедраен кивалтӥсез А.Г. Шкляев, кудӥз «Дискурс Трокая. Слово о Трофиме Кузьмиче Борисове» («Трокайлэн дискурсэз. Трофим Кузьмич Борисовлы сӥзем кылъёс»).


Докладэныз тунсыкъяськыса, мон кенеши А.Г. Шкляевен. Тани мар со вераз удмуртъёслэн туала ужпумъёс но Трокай Борисовлэн удмуртлыкез утён понна ужамез сярысь:

«Тужгес кулэлыко ужпум, кудӥз вал ӝутэмын та конференциын удмурт кылъя но литератураен герӟаськисез - удмурт калыкез оскытон удмурт кылын но вылӥ культура лэсьтыны луэ шуыса. Трофим Борисов - одӥгез дано удмурт адями, кудӥз инъет сётиз удмурт кунлыклы, со ӵапак вань улонзэ сётӥз, удмуртъёс мукет калыкъёсын ог радын мед луозы, югыт улонэ мед потозы шуыса но асьсэдыс мед шӧдозы сыӵе ик адямиен, кызьы шӧдо асьсэзыс азьпала кошкем калыкъёс. Удмурт адями валалоз аслэсьтыз данлыксэ но аслаз кылыныз вераськыны но лыдӟиськыны быгатоз. Удмурт кыл вань удысъёсы мед пыроз, кылсярысь, кун ёзнэтъёсын но, вузкаронниосын но, школаосын но соин мед вераськозы. Асьмелэн удмурт элькунамы удмурт кыл - кун кыл бере, со вань кун структураосын кутӥськыны кулэ. Со понна асьмелэн луыны кулэ трос дышетскем но удмурт кылын вераськыны но гожъяськыны быгатӥсь адямиос. Соос тодыны кулэ удмурт но ӟуч кылэз но, соос медам малпалэ, кыӵе ке но кыл улӥынгес сылэ шуыса.

Азьвыл вал сыӵе школаос, кытын вань предметъёсты дышетӥзы удмурт кылын, отысь потылӥзы туж усто, культуразэс гажась, асьсэ кылзэс яратӥсь адямиос-ӧнерчиос. 60-70-тӥ аръёсы удмурт кыллэн кризисэз кутскиз - удмурт школаосты но удмурт газетъёсты пытсаны кутскизы. 30-тӥ аръёсты учкыса, соку 12 ёросын йыг-йыг удмурт газет вал. Нош али, «Иднакар» сяна, кудӥз 4 ёрос понна потэ удмурт но ӟуч кылын, сыӵе газетъёс кылемын ӧвӧл ни. Али пӧртэм пичи ёрос газетъёс удмурт кылын потто ке но, со вкладыш выллем гинэ ни.

Конференция Трофим Борисовлы 120 арес тырмонэзлы сӥземын вал. Шумпоттэ, туала Трофим Борисовлы сӥзем ужрадъёс мыно туж вылӥ пагӟаын (ӝыбыын). 100 но 110 аресъёсыз туж дӥсьтытэк пусъемын вал. Али дыре адямиос Борисовез но солэсь ужъёссэ умойгес тодыны кутскизы но, солэн данлыкез трослы вылэ жутӥськиз. Туала ар, асьме удмурт Кункивалтӥсьмылэн указэзъя, ялэмын вал Трокай Борисовлэн арез шуыса. Чакламын Трофим Борисовлы Ижкаре синпелет пуктыны. Ваньмыз со, малпасько, ӝутоз Борисовлэсь нимзэ отчы, кытын со луыны кулэ, малы ке шуоно вань удмурт удысъёс со бордысь потэмын. Нош малы татчыозь калык Борисовез ичи тодэ вал? Со герӟаськемын тани маин. Трокай укылтэм адямиослэн доносъёссыя, пӧртэм уртылӥськонъёссыя ньыль пол янгыше уськытэмын вал. Со пытсэт сьӧрын ик кулӥз но. 1980-ти аръёсы солэн вынмуртэзлэн Иван Николаевич Борисовлэн, профессорлэн К.И. Куликовлэн, тодосчилэн Н.П. Павловлэн тыршемемзыя Трокай шонере поттэмын вал. Али вань ӧсъёс усьтӥськемын солэсь творчествозэ эскерон понна. Оскисько: кӧня ке дыр ортчыса Трокай Борисов калык герой луоз, солэн синпелетэз (памятникез) доры сяськаос нуллозы.

Пленар заседание бере кутскиз секциослэн ужзы. Конференцие пыриськисьёс люкемын вал кык секцилы: «Трофим Борисов но удмурт йӧскалык журналистика но литература» но кыкетӥез - «Гудыри» газет но СМИ- ослэн кылзы. Трокай Борисовлэн «Удмурт кыллюкамез» но выль кылбичетъёс поттонын ужпумъёс».

Конференциын йӧскалык журналистикалэн азинсконэз но быдэстоно ужпумъёс пумысен вераськонъёс мынӥзы. Удмурт тодосчиос, дышетӥсьёс но студентъёс сяна докладъёс дасязы Саранскысь, Йошкар-Олаысь, Санкт-Петербургысь, Сыктывкарысь, Казаньысь но Финляндиысь журналистъёс но тодосчиос.

Кылсярысь, одӥгез доклад сӥземын вал выль потэм кылъёслы но кыллюкам гожъянлы, сое эскериз филологиез тодонъя доктор Р. Ш. Нассибуллин. Солэн докладэз «Кыллюкаме ватсан. Мар умойгес: калькирование яке заимствование?» яке «Удмурт пуризмлэн генезисэз».

«Асьме удмурт кылдытонын туж трос ужпумъёс, малы ке шуоно лексика удысын но тужгес но теория ласянь исследованиос уг нуисько. Туннэ понна тужгес но «пӧсь» валанъёс луо «калькирование», «заимствование» но «пуризм», вераз Риф Шакрисламович. - Заимствование – артэ улӥсь калыклэсь кылъёссэ мукет калыклэн кылаз пыртон. Кылсярысь, асьме удмурт кыламы вань трос бигер но ӟуч кылъёс. Тани, шуом, удмуртъёс азьло кинлы кытын каньыл улыны отын ик улэ вылэм. Петр 1 эксэй луэм бере указ потэм, коркаосты чурен-чурен пуктылоно, пе. Уйпал удмуртъёс, ӟучъёслэсь «улица» кылзэс басьтыса, ульча шуыны кутскиллям, нош лымшор удмуртъёс бигер кылысь басьтыса – урам (бигер кылысь котыртэм) нималлям.

Калькирование – мукет кыллэн модельёсызъя но ас кыллэсь ёзнэтсэ кутыса, выль кылъёс пӧрмытон Тужгес но калька лэсьтыны каньыл сыӵе терминъёсыз, кудъёсыз кык люкетлэсь пӧрмемын: одӥгез - валэктоно кыл, мукетыз - валэктӥсь кыл. Кылсярысь, ӟуч кылын «железная дорога». Удмуртъёс кемалась «железоез» тодо вал, сое соос корт шуо. Удмурт кылэ со «кортсюрес» берыктӥське. Но удмуртъёс сое «чугунсюрес» шуо. Малы со озьы? Малы ке шуоно, ӟучъёс азьло дыръёсы «чугунная дорога» шуо вылэм, соин удмуртэ «чугун сюрес шуыса берыктэмын .

Пуризм – кылэ пырем заимствованиослы пумит луэм, кылэз «чылкыт» карыны турттон. Туала вакытэ мынэ уж анай кылӥсь пырем заимствованиосыз вошъян, тани асьмеос, удмуртъёс, кутскимы азьло пырем кылъёсыз вошъяны, кылсярысь, закон – кат, конституция-кункат, комиссия - ори, бюджет - коньдэт. «Комиссия» кыл, шуом, кутэмын 1907 арын ик, со ваньмызлы валамон, нош «ӧри» кутэм - кылэз валантэм каре. Ӧри - бигер кылын - пудо уллё (куке сӥзьыл пастухе поттамысь дугдо, 3-4 семьяос пудозэс асьсэ коже люкало). Пудо ӧри гурт кузя ветлэ но бакчаосысь кубистаез сие.

Азьло пырем кылъёсыз ас кылэ кужмысь тупатъям - пуризм нимаське, со - кылэз сӧре но куажгатэ. Асьме удмурт кылэ но пырем кылъёсыз али весь вошъяло, соос интые нокинлы но тодмотэм кылъёсты пырто.

Калькирование-а, заимствование-а умойгес но кулэгес - вераны уг луы, малы ке шуоно котькудӥз соос пӧлысь урод но умой но пала берытскыны быгатэ. Валатэк лэсьтэммы асьмелэсь удмурт кылмес пушласянь лябатэ. Калькированиен но заимствованиен йырин удмурт кылъёсмы вуныны быгато, нош пуризмен йырин укыр трос выль валантэм но кулэтэм кылъёс пото».

Та конференциын эскеремын на вал туж трос кулэлыко луись, висетӥсь ужпумъёс, кудъёсыз бордын кулэ туала дыре эшшо но эшшо ужаны. Т. Борисов но трос мукет удмурт югдытӥсьёс улонзэс сётӥзы удмурт кылэз, лулчеберлыкез утён понна. Малы-о ми, туала удмуртъёс, соослэн виренызы лэсьтэм яке кутскем ужъёссэс кулэ ум кариське, ум быдэстӥське? Со удмуртлыкез сӧрон туж умой шӧдӥське но адӟиське. Удмурт шаерысь трос школаосын удмурт кылэз но литератураез уг дышето яке солэсь часъёссэ кулэсто. Асьмелэн, удмуртъёслэн, туж урод сяммы вань - ас кылыдлэсь возьдаськон. Озьы но луэ, кыӵе ке ӟуч кивалтӥсь тырше школаяз удмурт кылэз мед дышетозы, пиналъёс мед удмуртэз тодозы шуыса, нош удмурт кивалтӥсь школаысьтыз удмурт кылэз дышетон интые мукет предмет пуктэ. Удмурт кылэз утён понна бигеръёсын кулэ, лэся, вераськыны: соос шаерамы бигер кылэз дышетон борды кутскизы ке, удмурт кылэз но оло сьӧразы кыскозы. Тужгес но туала вакытэ кулэез ужпум: егитъёс но пиналъёс удмурт сямен мед вераськозы, пичи дырысенызы удмуртсэ тодӥсьёс, удмурт кылын вераськем сяна, удмурт кылын мед малпаськозы.

Мукет трос верамъёс пӧлысь эшшо туж тунсыкозэ пусъё на. Лыдӟемын вал конференциын Хельсинкиысь тодосчилэн Юкка Пиетилайненлэн докладэз, ачиз Юкка лыктыны ӧз ке но быгаты. Юкка - Россиысь газет-журналъёсъя ӧнерчи. Сӥзьыл ветлӥз асьме доры, Удмурт шаере, учкиз-чаклаз асьме прессаез. Удмурт шаерысь вань газетъёсты, ӟучъёссэ но, ог огенызы ӵошатыса, Юкка «Удмурт дуннеез» ваньмыз пӧлысь устоен лыдъя.


Таӵе ужрадъёс кулэ ӵемгес ортчытъяны, медаз вунэ шуг-секытъёсмы, ужпумъёсмы. Дэмен асьмеос быгатом анай кылмес, йылолъёсмес, лулчеберлыкмес утьыны, азьлань улонэ вамыштыны.

Мария Золотарёва

Удмуртлык

Просмотров: 263

Комментарий

Вы должны быть участником Uralistica, чтобы добавлять комментарии!

Вступить в Uralistica

© 2021   Created by Ortem.   При поддержке

Эмблемы  |  Сообщить о проблеме  |  Условия использования