Uralistica

“Удмурт дуннелэн" дуннеез паськыталоз-а?

Газетъёс понна али секыт вакыт. Удмурт  прессалы азьло аръёсын ӵошатоно ке, удмуртъёс ичигес саклык висъяло. Гожтӥськонлэн ужпумъёсыз сэрен, удмурт газетъёслэн тиражъёссы кулэсмо.

Таин валче валтӥсь редакторъёс йырзэс тӥяно луо газетсылэн азьлань сюресэз ласянь. Соин ужазы пӧртэм амалъёс борды басьтӥсько.   

 

Кыӵе омырен туннэ шока “Удмурт дунне” но ма муген элькунысьтымы тужгес арлыдоез газет кулэ потыны кык-куинь кылын “Уралистика” тодӥз валтӥсь редакторезлэсь Зинаида Рябининалэсь.  

 

- Кыӵе югдур газетлэн тираженыз?

- Ваньмызлэн кадь ик — урод. Совето аръёсы газетэз басьтӥсьёслэн лыдзы 25 сюрсозь вуылӥз. Соку газет нокыӵе могӟетъёстэк вӧлмиз. Косӥз партсекретарь «Советской Удмуртилы» гожтӥськыны – иське, гожтӥськоно. Журналистъёс, туннэ сямен лыдӟись утчаса, гуртъёстӥ ӧз костаське. Али 100 аръем юбилейзэ газет пумита 4 сюрс тиражен... Зэм, сыӵе югдур ваньмызлэн газетъёслэн-журналъёслэн - йыр бордазы кырмисько ӟуч кылын потӥсь валтӥсь газетъёс но.

- Кыӵе ужпум пуктӥськоды газет азе?

- Улэп кыльыны! Бумага вылын эшшо даур печатласьконэзлы оскон овӧл, конешно, но табере вань интернет! Огласянь со туж умой – инвисъёс паськытало. Талы луыса милемлы но улон ӧръя кариськоно – выль технологиослэсь бере кылёно ӧвӧл. Со понна воштӥськоно лыдӟисьлы но, газетэз дасясьёслы но. Жаляса верано, асьме калык выль амалъёсты улоназ мылпоттэк пыртэ.

 

- Мар вылез луоз «Удмурт дуннеын» 2015 аре?

2015 ар ми понна но, Удмуртиысь печать понна но туж дано - 4-тӥ феврале «Удмурт дунне»-лы 100 ар тырме. Та бадӟым лыдпус - вуиз дыр, куке даур ӵоже ужаммылы йылпумъянъёс лэсьтоно, выль ужрадъёс чаклано.

Зэмзэ вераса, ми юбилеймес азьлогес пусйыны кутским ни, шуыны, луоз — берло 3 ар ӵоже 10-лэсь тросгес социальной проект улонэ пыӵатэмын, газетысь рубрикаос сӥземын историмылы, лыдӟисен кусыплы. Туннэ-ӵуказе издательствое келяськом «Удмурт дуннелэсь” Энциклопедизэ — со туж бадӟым уж! Отчы пыртэмын «Удмурт дуннелэн» историез, вань дыр ӵоже гожъясьёслэн нимтулъёссы (штатной но внештатной журналистъёс), газетэн герӟаськем пӧртэм интервьюос но мукет тунсыко материал. Удмурт кылын энциклопедиос асьмелэн ӧй вал на.

 

- Кыӵе ке выль журнализм форматъёс потозы-а?

- Туала выль амалъёс пӧлысь туж кельшымон пото диаграммаос но графикъёс. Тодмо, али калыклы кулэ вакчи иворъёс, бадӟым суредъёс-фотоос, графика – ваньмыз соку ик син азьын мед луоз. Но трос аръёс ӵоже мукет амалэн ужаммы аслэсьтыз каре. Басьясьёсмы но дышемын куал-куал ужез лыдӟыны. Воштӥськонъёс котьку секытэн сётӥсько, но соос одно кулэ.

Татын валтӥсез сюлмаськон - ӧвӧл специалистъёс. Кӧня вазиськылӥм ни институтъёсы — ӧвӧл удмурт дизайнеръёс, нуназе тылын утчаса но уд шедьты! Соин выриськом асьме кужымен — газетэз радъяло-лэсьто но гожъяло отчы удмурт кылосбуръя факультетэз быдтэмъёс, кӧняез ке вань журфак бере.

 

- Тросэзлэн СМИ-ослэн интернет-версиоссы вань ини. Малпаськоды-а уждэс интернетэ паськытгес вӧлмытыны?

- Милям вань электрон версимы, «Удмурт дунне» интернетэ потӥз 2006-тӥ арын. Инвисъёсты одно ик паськытатононо. Зэм, вал малпан «Удмурт дунне» ивор портал кылдытыны, но али кужыммы уг тырмы, соин ик возьмаськом шаплы, етӥз егитъёсты.

Бадӟым «сьӧлыко» малпанэ вань – «Удмурт дунне»-лэсь дуннезэ паськытатон. Уг тодӥськы, шонер валалозы-а монэ, уз-а, но туннэ асьме пӧлын гинэ пӧзьыса, азинлык уд адӟы ни. «Удмурт дунне» бренд луыны кулэ. Мед тодозы сое ӟучъёс но, кунсьӧръёс но. Али асьме понна гинэ гожъяськиськом пӧрме, нош потэ, удмурт дуннелэсь сюлмаськонъёссэ но шумпотонъёссэ мед тодозы ваньмыз. Валамон, со понна кулэ кык кылын (оло куинен но) гожъяськыны, кык поллы золгес тыршыны, кык поллы визьмогес луыны. Валаса тыршид ке, газет солэсь удмуртомоз гинэ.

- Али СМИ-осын калыкен ваче кусып возён паськыт вӧлмемын - лыдӟисьёс ас малпанъёсынызы газетэ вазиськыны быгато…

- Милям лыдӟисен кусыпъёсмы ноку но ӧз ышылэ. «Удмурт дунне» калыклы тужгес матысез газет шуыса тодӥсько. Вазен дыръя редакцие мешокъёсын гожтэтъёс вуыло вылэм. Калык гожъяське али но, ялан жингыръяло, кин ке сюлэмшугзэ вера, кин ке огшоры вераське, куное ӧте. Лыдӟисьёсмылэн ивортэмзыя сюрес вылэ потон - нырысетӥ интыын. Газетчиосты гуртоос котьку возьмало, угось ми ветлэм бере югдурзы умоя: янгышасьёс шапыт карисько – соку ик дась тупатскыны.

Таӵе дыръёсы кужым кылдэ. Калык понна нюръяськыны секыт ӧвӧл, аслыд юрттыны шуг…

- Кыӵе куронъёс пуктӥськоды журналистъёс азе?

- Вакчияк верано ке, лыдӟисьлэсь визьмогес луоно. Азьвыл со шуо вал, журналист — со дилетант. Мон лыдъясько, али корреспондент гожтоно темазэ специалистъёслэсь зол валаны кулэ. Уг яра малпаны, “а, пенсионеръёслы яралоз”, син азе пуктоно визьмо лыдӟисез. Журналист мед быгатоз малпаськыны! Муртлэсь малпанзэ гожъясь гинэ медаз лу, улон югдур шоры аслаз учконэз мед луоз.

 

- Удмурт кылъя югдурез возьматэ-а «Удмурт дунне»?

- А кин сое возьматоз на, ми ке ӧм? Трос гожъяськом кылэнымы герӟаськем югдур сярысь . Кӧня ке ар талэсь азьло оптимизацилы луыса, пичи школаосты выжтӥзы бадӟымъёсаз, озьы удмурт кылъя предмет пумен выжиз факультатив амалэ. Соизлэсь но дырзэ шаплы дышетӥсьёс басьязы ЕГЭ-лы пиналъёсты дасяны. Ми дугдылытэк гожъям та сярысь, вазиським Кун Кенеше, «Удмурт Кенеше». Кивалтӥсьёс школа директоръёслэсь кылзэс юам бере, югдур воштӥськыны ӧдъяз — куд-огаз школаосын анай кылъя урокъёс берыктэмын. Кылсярысь, озьы Чутырын удмурт кылэз выльысь дышетыны кутскизы.

Али вакыт нош ик куре удмуртлыкмы борды ӝабырскыны. Вылласянь учконо ке, ваньмыз умой кадь. Но зэмос югдур чылкак мукет: дас ар ӵоже 100 удмурт школа пытсаське, удмурт книгаосмес тросгес потто эстонъёс, удмурт ужрадъёслы уксё висъяло финъёс, удмурт кино лэсьто полякъёс… Но номыр шоры учкытэк, вылӥысь гинэ возьматэк, асьмеос но маке лэсьтыны кулэ.

Вераны кулэ, мон туж синмаськисько туала егитъёслы. Угось соос туннэ асьсэзыс шедьто удмуртлык пыр. Соин пӧртэм тунсыко проектъёс радъяло. Кылсярысь, пӧртэм литературной ӝытъёс, модая фестивальёс радъяло, кино, мультфильмъёс, пӧртэм видео бордын ужало… Ми сыӵеесь ӧй вал. Али туж пайдаё воштӥськонъёс мыно, тросэз со, валамон, интернетлы луыса.

- Кыӵе югдур оглом удмурт медиа омырын?

- Югдур али котькытын огвыллемгес мон шуысал. Жаляса верано, журналистъёслэн луонлыксы ӧвӧл пӧртэм проектъёс дасяны. Аналитикалы сӥзем программаос ӧжыт. Ма со гинэ-а? Тани газетчиослы кыче ке учыръя статья лэсьтыны номыр уг люкеты ке, радиоын-телевидениын ужасьёслэн ӟигарзы быре удмурт кылын вераськись геройёс утчаса — яке соос ӧвӧл, яке анай кылынызы сыӵе алама верасько, возьдаськыса, эсьма, телевизордэ кысод. Соин ик мар карыны паймыса, студие весь огъёссэгес ик ӧтёно луо.

Гуртоос туж ярато радиоез кылзыны, но отын тросгес кырӟан-ӟабыльтон. Ми пичи дыръя радиоын ӵем чузъясько вал яркыт очеркъёс, соос ӵукнаысен мынылӥзы- сыӵе чебер куараен, кылын, табань сиён но вунылӥз.

Вераны кулэ, али котькытын ӟуч кылысь берыктэм иворъёс - милям но газетамы. Со алама, но озьытэк уг лу – али информация ӝог потэ, но солэсь но шаплыгес кулэтэм луэ.

 

- Мар малпаськоды вотэсысь удмурт пабликъёс но журналъёс сярысь?

Удмурт пабликъёслэн вӧлмемзы туж умой. Удмуртъёс но технологиослэсь бере кыльыны кулэ ӧвӧл – дуннеен огпыдысь вамышъяно.

Дыр ке сюре, кельше соосты лыдӟыны. Котькытын мед луод – пыриськод планшет пыр интернетэ но удмуртлыкен герӟаськем иворъёсты шедьтӥськод. Кылсярысь, мыным тунсыко потэ «Ваньмон дыр» выллем удмурт ресурсъёс. Нимыз но туж шонер: дырыд вань ке, пыриськод но учкиськод, кыӵе ужрадъёсы ветлыны луоз. Туала тунсыко афиша.

- Тросэз егитъёс асьсэлэсь мылкыдзэс блогъёсын шараяло? Кызьы тӥ учкиськоды блогъёс шоры?

- Мон сямен, удмурт блогъёс воштӥзы азьло дневникъёсты. Отын мылкыдъёс, малпанъёс ӧжыт. Соин куддыр паймисько блог нуись ассэ журналист шуэ ке. Со шонер ӧвӧл. Журналистлэн иворез котыр ласянь эскеремын луыны кулэ, «озьы шуо» гинэ овӧл. Мукет ужпум ни, куке блогъёсы гожъяськыса егит мурт быгатонлыкъёссэ будэтэ – журналистлы пӧрме.

Туала блогеръёс пӧлысь пусйысал, дыр, Даралиез гинэ. Гожъямъёсыз лякыт но яркыт: уг индылы, уг пыкылы, ваньзэ ачиз сярысь вала, сьӧлыкъёссэ но, вормонъёссэ но уг ваты. Огкылын вераса, солэн ваньмыз ческыт пӧрме, соин гожтэмзэ лыдӟыса уд дыртӥськы мукет бам вылэ потыны - минутлы ке но малпаськонэ выйиськод.

 

- Вань-а али цензура?

– Со котьку вал, вошъяське солэн кужымез но формаез гинэ. «Удмурт дунне» сярысь верано ке – газетмес элькун поттэ бере, нырысь ик ми лыдэ басьтӥськом Кивалтэтлэсь куронъёссэ, соиз валамон. Но туж юн чакласа возё ӧй шуысал - бӧрдӥсьёс ӧвӧл. Вал сыӵе вакытъёс, куке шуылӥзы, тазэ гожтоно, тазэ — уг яра, созэ — нырысетӥ баме, тазэ — адӟиськонтэм интые. Али югдур мукет – котькуд вамышез чакласа уг уло, элькунмылэн Йырызлэн ужъёсыз сярысь дугдылытэк печатланы уг косо. Соин пуштросъя учконо ке, газет аспӧртэмлыко: вань нимысьтыз выпускъёсмы егитъёслы, литератураез гажасьёслы, юртъер возисьёслы — ваньмыз, мар кулэ.

 

- Финн-угор газетъёс пӧлысь кудзэ ӟечлыкезъя тӥ висъясалды?

- Жаляса верано, мон уг валаськы мукет фин-угор кылъёсты, соин дунъяме палдурес луоз. Кусыпъёсмы ваньмыныз эшлыкоесь, тани дас ар ӵоже ини вань асьмелэн огазеяськонмы — Россиысь фин-угор журналистъёслэн огазеяськонзы: пумиськылӥськом, фестивальёс-семинаръёс ортчытъяськом. Али уж мынэ огъя сайт кылдытон бордын. Но мынам адӟеме потэ вал солэсь рос-просгес ужамзэ - туннэ со формальнойгес луэ.

 

- Нош кыӵе газетъёслэсь ужады адӟем кариськоды?

- Кельшо сыӵе газетъёс, кытын редакция ивор поттыса гинэ уг улы. Со мае ке туж кулэзэ калык доры вуттыны тырше, кылсярысь, социальной проектъёс бордын ужа. Милям но ужмы огшоры бумага быдтэм гинэ медаз лу кадь – калыклэсь кыӵе ке мылкыдзэ возьмано. Гожъяммы пушсэ мед бугыртоз, мед малпаськытоз лыдӟисез. Кин ке газет бамез маялтыса, шкафе поноз, мукетыз кесяса куштоз - соиз но умой, урод овӧл - иське, газет адямилэн йыраз ӝабырскиз…

 

- Мар тужгес но секытэз редакторлэн ужаз?

Кыл кутон, дыр. Кышкан - газет кулэ луэмысь дугдоз шуыса. Котькинлэн кинлы ке кулэ луэмез потэ. Озьы ик газет но — дуныз медаз быры.

Надежда Рысьева

Просмотров: 345

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования