Uralistica

Удмурт кылын мерлык но политика удысысь нимкылъёслэн юнмамзы но азинскемзы

Удмурт кылын выль кылъёсты кылдытонлэн историез туж тунсыко но аспортэмлыко. Портэм вакытъёсы та удысын тужгес но кужмоосыз удмурт визьужасьёс тыршизы. Ми эскериськом та ужлэсь пичизэ гинэ люкетсэ, чапак мерлык но политика удысысь кылъёсты.
Мерлык но политика удысысь кылъёс пушкы пыртыны луэ кылбугорлэсь сыче люкетсэ, кудиз улонысь мерлыкен но политикаен герзаськем валатонъёсты но югдуръёсты огазея. Со быгатэ пушказ возьыны:
1) политика удысысь юромо кылдытэм лексикаез: татчы пырозы должностьёсты, кун учреждениосты, политической партиосты нимась кылъёс, калыккуспо политикаен герзаськем нимкылъёс, юридической но экономикаен герзаськем нимкылъёс, ожгар лексика.
2) огъя политика удысысь лексика: татчы пырозы философиен, социологиен, лулчеберетэн, осконэн герзаськем нимкылъёс, кудъёсыз газет-журналъёсын, телевидениын, радиоын паськыт кутисько.
Удмурт лекикалэн азинсконаз быдэсак, но озьы ик солэн мерлык но политика удысаз 4 вакыт висъяны луоно:
1) XVIII даур — 1920-ти аръёс — лексикалэн юнмамез но нимкылъёс кылдытонлэн бадзым кулэлыкез.
2) 1920-40-ти аръёс — удмурт кыллэсь зечлыксэ умоятон.
3) 1940-90-ти аръёс — та удысын уж ожыт гинэ нуиське.
4) 1990-ти аръёсысен туннэ нуналозь — выльысен та удыслэн улземез.
1 вакыт. Удмурт шаерын выль кылъёсты кылдытон тупа XVIII даурлы, чапак та вакытэ ик быдэсак кылосбур тодослык но кылдыны кутске. Таче тупан юнме овол, угось XVIII даур — Россиысь дышетсконлэн, экономикалэн, политикалэн, техникалэн но тодослыклэн азинскон даурез.
Чакланы луэ, XVIII – XIX дауре удмурт кылын литература тросгес осконэн герзаськем яке визьнодан шомъем потылиз. Валамон ни, чапак та удысъёсын ик выль нимкылъёс пормыны быгатизы, но соин валче мукет но тематической группаос палэнэ оз кыле. Озьы XVIII даурысь кылем вашкала удмурт синпельметъёсын паськыт гинэ кутисько географической но биологической нимкылъёс, но ожыт пумиськылэ мерлык но политика удысысь лексика. Кылясрысь, нырысети грамматикаын мерлык но политика удысысь таче нимкылъёс пумиськыло: кунъ, эксей, эксейлэнъ кышно, тамgа, тэре, седмуртъ но о. а; З. Кротовлэн кыллюкамаз: гурт iир, быдзим эксей улос, карысь мурт, быдзим лекъ, кертымъ, вужкатъ, калык люканъ но о. а.; Могилинлэн ужаз: кенешъ, дунъ, уваньбуръ, возь, кузiо, урья.
2 вакыт. 20-ти-40-ти аръёс Т. Борисовлэн, К. Гердлэн, И. С. Михеевлэн, И. В. Яковлевлэн, С. П. Жуковлэн, Кедра Митрейлэн нимъёсынызы герзаськемын. Соос юромо кылдытэм Удмурт кылэз волмытонъя орие пыриськизы, кудиз берлогес «Рудья» шуыса нимамын вал. Та орилэн валтись ужпумез вал таче: удмурт кыл ас функциоссэ паськытатыны но огшоры вераськонысь мерлык удысэ выжыны, кун кыл луыны кулэ вал. Чапак та ори удмурт кылэ выль терминъёсты пыртылыны кутскиз. Озьы, выль кылъёс чемысь валтись удмурт «Гудыри» газетлэн бамъёсаз адзиськыны кутскизы. 1919-ти арын та газетын таче ужпум но эскериськиз: ӟуч кылысь нимкылъёслы тупась берыктэмъёсты уже кутоно: «Со кылъёсыз удмурт сямен но вераны луэ ук, соин ик удмурт кыл полы один но эн выре пыртыны ӟучсэ кылъёсты». Озьы 1926 арын газетын ужасьёс мылысь-кыдысь мерлык но политика удысысь выль нимкылъёсты пыртылизы: кенеш, тэкшерон, отчам, онер, юрт кузёос, законэз валатись, дур басьтись, куриськон, мынитэт, вазиськон. Тунсыко соиз но — коммунист, комсомолец, пионер, пленум, обисполком выллем кылъёс уг берыктисько.
Тужгес но азинлыко но тыршыса та удысын ужаз этнограф, кылбурчи, тодосчи, удмурт калыклэн дано пиез — Кузебай Герд. Со ужъёсаз ӟуч кылэз гинэ оз куты, финн кылэз но паськыт пыртылиз. «Суоми (финн) кыл сярысь но удмурт кыл сярысь» статьяяз, кудиз 1926 арын «Кенеш» журналын печатласькиз, со гожтэ: ««Выжыяськон понна выль кылъёслэсь выжызэс удмурт кыл пушкысь басьтоно яке со выль кылъёсыз мукет финн выжы кылъёсыз эскерыса кылдытоно. Кылсярысь, суоми кылысь но асьмелы но ярамзэ омыртыно».
Кузебай Герд, кылсярысь, калькирование амалэз уже кутыса, финн кылысь таче нимкылэз берыктыны дэмла: финн кылын документ луоз asiakirija (asia – уж, kirja – книга, гожтэт), озьыен та кылэз ужкнига, ужкагаз шуыса берыктыны луоно.
Со сяна, Кузебай Герд удмурт кыллэсь пуш узырылыксэ паськыт кутиз — кылъёсты валчеян амалэз, волскем кылпормытись итэтъёсты. «Кыл веме. Выль удмурт кылъёсыз кылдытон сярысь» статьяяз, кудиз 1924 арын «Гудыри» газетын печатлаське, со выль кылъёс пормытыны огъя катъёс, огъя сюресъёс шедьтыны дэмла. К. Герд гожтэ: «Выль кылъёсыз кылдытъяны кыӵе ке одӥг сюрес, одӥг правило шедьтыны кулэ. Со сюресэз шедьтӥм ке, соку удмурт кыл, ву ӧръяськем кадь, ӧръяськыса кошкоз. Выль кылъёсыз кылдытыку эскерыны кулэ, кыӵе сюресъёстӥ удмурт калык ачиз аслыз выль кылъёс кылдытэ».
Аслэсьтыз кылъёссэ юнматон понна, со Вавож ёросысь Докъя гуртлэн вераськетысьтыз выль кылъёслэсь пормонзэс валэктэ: -эт (-ет) но –ос итэтъёсты уже кутыса. К. Герд та итэтъёсын таче выль кылъёсты дэмла: зэмос, курет, индылэт, пуктэт, эштос. Куд- огез солэн дэмлам кылъёсыз полысь литературной кылэ но юнмазы: кунгож, дан, кенеш, огазеяськон, йыруж, торо.
«Рудья» огазеяськон туж емышо ужаз. Ёзчиосызлэн тыршемзыя, удмурт литературной кыллэн инъетэз кылдиз, шонер гожъяськон првилоос юнмазы но удмурт кыл трос выль кылъёсын узырмиз. Та уж азьланяз но туж усто нуиськысал, вылды, «Рудья» орилэн тросэз ёзчиосыз 1932-1933-ти но белогес аръёсы пытсэт сьоры ке келямын ой луысалзы. Озьы, та уж кема аръёслы чакмиз.
3 вакыт. 40-90-ти аръёсы та удысын уж туж ожыт нуиське. 1936 арын Удмурт обкомлэн пленумезлэн посстановлениез потиз. Со посстановлениын «националистъёслэн» малпам нимкылъёссылэсь шонерак куштиськыны дэмламын вал, но озьы ик та выллем кылъёслэсь: кун, курбон, эксэй, быдзым, кудъёсыз, пе, удмуртъёслэсь вашкала улонзэс возьмато но улон шоры буржуазной синмын учконэз данъяло.
Озьы калленэн 30-ти аръёсы басьтэм азинсконъёс вуно, кошко. Сыче политика 80-ти аръёслэн пумозязы — 90-ти аръёслэн кутсконазы гинэ воштиське. Со сяна, 1960-ти аръёсысен шаерысьтымы школаосын удмурт кылэз предмет сямен гинэ дышетыны кутскизы, нош куд-ог ёросъёсын (Сюмси, Грак, Кизнер, Селты, Красногорье, Яр), Киров но Пермь улосвылъёсын нылпиосты ӟуч кылын нырысети класысен дышетыны кутскизы. Озьы удмурт кылысь 30-ти аръёсы кылдытэм вань удысъёсъя нимкылъёс вунизы, нош газет-журналъёсын, кытын мерлык но политика удысысь кылъёсты туж уно куто вал, ӟуч кылысь пырем кылъёсты оз берыктылэ ни со учыръёсы но, куке удмурт кылын солы тупась кылъёс но вал: обращение вазиськон интые, Верховный совет Выли кенеш интые, собрание отчам интые.
Озьы, огшоры вераськонын но котькуд удмурт кыл борсьы кык-куинь ӟучсэ вераны кутскизы. Тодметнимъёслэн вакчиятэм формазы интые –ой, -ей, -ий, -ной, -ской итэтъёсын формаос кутиськизы: Удмуртской Республика Удмурт Элькун интые, Российской государство Росси кун интые.
Вераны кулэ, та вакытэ ономастика, диалектология удысъёс азинско, шонер гожъяськон но пусъёс пуктылон правилоослэн зечлыксы будэ, но удмурт кыллэсь кыллюкамзэ выль кылъёсын, нимкылъёсын узырмытон ласянь адскымон ужъёс оз нуиське.
4 вакыт. 90-ти аръёсы, 30-ти аръёсы сямен ик, тодмо но дано удмурт тодосчиос, гожъяськисьёс, иворчиос выль кылъёсты пормытон борды басьтиськизы. Соос удмурт кыллэсь вань пуш узырлыксэ лыдэ басьтизы (кылъёсты валчеянэз, итэтъёсты, азьитэтъёсты), озьы ик мукет кылъёсысь калькирование амалэн берыктонэз но паськыт кутизы. Удмурт кылэ берыктыны кутскизы трос гинэ мерлык но политика удысысь нимкылъёсты: Кун Кенеш, шоркар, огазеяськон, муниципал кылдытэт, ёрос но о. а.
Та ужез азинтон понна но Удмурт Элькунлэсь кункатсэ берыктон понна берыктисьесты огазеяны тыршизы, нош 1995-ти арысен нимкылъёсъя но шонер гожъяськонъя ори кылдиз. Та орилэн одигез валтись ужпумез вал — удмурт кылэ политика, экономика но мукет удысъёсысь выль кылъёсты берыктон. Соослэн ужзылэн емышез кык бичет луиз, кытчы ог 600 пала выль нимкылъёс пыризы. Валамон ини, соос полын трос гинэ мерлык но политика удысысь нимкылъёс пумисько: азьмурт, калык отчам, мер, ожчи, кункрезь но о. а. Жаляса верано, коньдон ласянь шуг-секытъёс кылдэм сэрен, та уж коня ке аръёслы чалмиз.
Выльысен та уж нуиськыны кутске 2005-ти арын, куке Удмурт Элькунлэн Азьмуртэз та ориез люканъя указ дасяз. Валтись ужпумзы таче вал: Удмурт Элькунлэсь кункатсэ тупатъян, дас ар чоже кылысь воштиськем югдуръёсты лыдэ басьтыса. Озьы вылез кункат ас пушказ тросгес мерлык но политика удысысь выль кылъёсты басьтыны кулэ вал. Но со выль нимкылъёсты огшоры вераськисьлы чемысь валаны секытгес луэ. Кылсярысь, «Удмурт Элькунысь Кун Кенеш кылдытэ Удмурт Элькунысь Кун Кенешлэсь ялан ужась ӧриоссэ, кудъёсызлэн кылдытон радзы, огинлыксы но ужоскетъёссы тупатӥсько Удмурт Элькун катэн».
Дыр возьматоз, пырозы-а выль нимкылъёс литературной кылэ, кутозы-а соосты вераськоназы огшоры адямиос. Валамон огез: удмурт кылэ выль нимкылъёсты пыртон — туала улонлэн куронъёсыз, соос возьмато удмурт кыллэсь азинсконзэ, выль лёгэтэ вуэмзэ.

Просмотров: 317

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Niimshur, Октябрь 2, 2010 в 11:53am
есть такая удмуртская стилистика
öвöл нӥ дасьъёсыз тӥрен корыштыны - быдтӥзы кылем дауръёсы сыӵеоссэ, быдтӥзы (?)
Метисъёс гинэ дасесь.... оо-а?
Комментарий от: Niimshur, Октябрь 2, 2010 в 11:49am
малы кириллкаын ö ум пуктӥське?
Комментарий от: Ortem, Октябрь 2, 2010 в 12:17am
есть такая удмуртская стилистика: может быть получится, а может быть, и нет. время покажет. от нас будто бы не зависит

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования